ڈاکٹر جہاں گیر حسن مصباحی

ڈاکٹر محمد جہاں گیر حسن مصباحی صوبہ بہار کےضلع مشرقی چمپارن سے تعلق رکھتے ہیں۔ آپ کی جائے پیدائش محلہ حسن پور، پوسٹ بسبٹا بازار ہے جو ضلع سیتامڑھی میں واقع ہے۔ آپ یہیں ۱۹۸۰ء میں اپنے دادیہال میں پیدا ہوئے۔ آپ کی تعلیم و تربیت اور پرورش و پرداخت، آپ کے دادا ولی محمد مرحوم کی مرہون منت ہے۔ ابتدائی تعلیم محلہ ہی کے مدرسے ’’جامعہ عربیہ رضاء العلوم‘‘ میں ہوئی۔ یہ مدرسہ آپ کے دادا ولی محمد مرحوم کی تحریک پر قائم کیا گیا تھا۔ مزید آگے کی تعلیم جامعہ امجدیہ گھوسی سے حاصل کی اور پھر درس نظامی کی تکمیل جامعہ اشرفیہ مبارکپور ضلع اعظم گڑھ سے کی اور ۱۹۹۷ء میں سند فضیلت سے سرفراز کیے گئے۔ اس کے دو تین سال بعد آپ نے یونیورسٹی کی دنیا میں قدم رکھا اور بی اے (جامعہ ملیہ ) اور ایم اے (دہلی یونیورسٹی) سے فراغت کے بعد جامعہ ملیہ اسلامیہ، نئی دہلی میں ایم فل اور پی ایچ ڈی کی ڈگری سے سرفراز ہوئے۔ الہ آباد کے ہی ایک عظیم فکشن نگار اعظم کریوی کی ادبی خدمات پر آپ نے پی ایچ ڈی کی سند حاصل کی ہے۔ موصوف دینی و عصری دونوں علو م سے آراستہ ہیں۔ عہد طالب علمی سے ہی تحریر و قلم کا ذوق رکھتے ہیں۔ اس وقت سے اب تک مسلسل لکھ رہے ہیں۔ زود نویس بھی ہیں اور خوب نویس بھی۔ فی الحال جامعہ عارفیہ میں درس و تدریس کے فرائض پر مامور ہیں اور ماہنامہ ’’خضر راہ‘‘ کے ایڈیٹر ہیں۔