ڈاکٹر جہاں گیر حسن کا تعلق صوبہ بہار کےضلع مشرقی چمپارن سےہے۔ 9؍ دسمبر 1980ء کو بمقام ہروہانی، ڈھاکہ، مشرقی چمپارن اپنے نانیہال میں پیدا ہوئے اور پرورش و پرداخت بمقام حسن پور، بسبٹا بازار، ضلع سیتامڑھی دادیہال میں ہوئی۔ پرورش و پرداخت اور تعلیم و تربیت آپ کے جداَمجد ولی محمد رحمہ اللہ کی مرہون منت ہے۔ پرائمری تعلیم و تربیت محلہ ہی کے مدرسے الجامعۃ العربیہ رضاءالعلوم، حسن پور میں ہوئی۔ یہ مدرسہ آپ کے جداَمجد کی تحریک پر قائم کیا گیا تھا۔ بعدہٗ الجامعۃ الاسلامیہ رضاءالعلوم، کنہواں (سیتامڑھی، بہار) میں داخل ہوئے اور مولانا حامد رضا اور مولانا عبدالحمید نوری رحمہما اللہ وغیرہ سے گلستاں و بوستاں کا درس لیا۔ اعلی تعلیم کے لیے پہلے جامعہ امجدیہ، گھوسی اور پھر جامعہ اشرفیہ، مبارکپور پہنچے اور 1997ء میں جامعہ اشرفیہ سے سندفضیلت حاصل کی۔ 2003 میں جامعہ ملیہ، نئی دہلی سے بی اے اور 2005 میں دہلی یونیورسٹی سے ایم اے اور 2006ء میں پی جی ڈپلوما اِن ماس میڈیا کی ڈگری حاصل کی۔ جامعہ ملیہ سے 2009ء میں ایم افل اور 2016ء میں ڈاکٹریٹ کی سند سے سرفراز کیے گئے۔ اِس میں درمیان کچھ وقت (2009-2010ء) کے لیے عارضی طور پر پٹنہ مسلم ہائی اسکول، پٹنہ میں بحیثیت اُردو اُستاذ تدریسی خدمات پر مامور رَہے۔ عہد طالب علمی سے ہی تحریر و قلم کا ذوق رکھتے ہیں۔ اُس وقت سے اب تک دینی وعلمی اور سیاسی وسماجی موضوعات پر مسلسل لکھ رہے ہیں۔ زودنویس بھی ہیں اور خوب نویس بھی۔ سیکڑوں مضامین و مقالات متعدد اخبارات و رسائل میں شائع ہوچکے ہیں اور یہ سلسلہ ہنوز جاری وساری ہے۔ 2012ء میں خانقاہ عارفیہ، سیدسراواں، الہ آباد سے منسلک ہوئے اور ماہنامہ ’’خضر راہ‘‘کے مدیر ہوئے اور تاحال اِدارتی ذمہ داری کے ساتھ ساتھ جامعہ عارفیہ میں درس و تدریس کے فرائض پر مامور ہیں ۔