ڈاکٹر محمد جہاں گیر حسن کا تعلق صوبہ بہار کےضلع مشرقی چمپارن سے ہے۔ 9؍ دسمبر 1980ء کو بمقام ہروہانی، ڈھاکہ، مشرقی چمپارن اپنے نانیہال میں پیدا ہوئے اور پرورش و پرداخت بمقام حسن پور، بسبٹا بازار، ضلع سیتامڑھی دادیہال میں ہوئی۔ آپ کی پرورش و پرداخت اور تعلیم و تربیت آپ کے جداَمجد ولی محمد رحمہ اللہ کی مرہون منت ہے۔ پرائمری تعلیم و تربیت محلے ہی کے مدرسے الجامعۃ العربیہ رضاءالعلوم، حسن پور میں ہوئی۔ یہ مدرسہ آپ کے جداَمجد کی تحریک پر قائم کیا گیا تھا۔ بعدہٗ الجامعۃ الاسلامیہ رضاءالعلوم، کنہواں (سیتامڑھی، بہار) میں داخل ہوئے اور مولانا حامد رضا (شاگرداعلی حضرت فاضل بریلوی رحمہ اللہ) اور مولانا عبدالحمید نوری رحمہما اللہ وغیرہ سے گلستاں و بوستاں کا درس لیا۔

 اعلی تعلیم کے لیے اوّلاً طیبہ العلماء الجامعہ الامجدیہ الرضویہ، گھوسی میں داخلہ لیا جہاں مولانا عبدالرحمٰن مصباحی، مولانا صدیق احمد مصباحی، مولانا اخلاق احمد مصباحی، مولانا آل مصطفیٰ مصباحی، مولانا صدرالوریٰ مصباحی وغیرہ سے شرف تلمذ حاصل ہوا۔ پھر الجامعہ الاشرفیہ کا علمی شہرہ سن کر آگے کی تعلیم کے لیے مبارکپور پہنچے اور 1997ء میں دیارحافظ ملت یعنی الجامعہ الاشرفیہ سے تکمیل فضیلت کی۔ الجامعۃ الاشرفیہ میں جن اساتذہ سے شرف تلمذ حاصل رہا اُن میں علامہ ضیاء المصطفیٰ قادری، علامہ عبدالشکور مصباحی، علامہ اسرار احمدگجڑھوی، علامہ نصیرالدین مصباحی، علامہ محمد احمد مصباحی، مفتی نظام الدین رضوی، مولانا اعجاز احمد، مولانا احمد القادری، مولانا عبدالحق مصباحی، مولانا شمس الہدیٰ مصباحی قابل ذکر ہیں۔

 2003ء میں جامعہ ملیہ اسلامیہ، نئی دہلی سے بی اے اور 2005ء میں دہلی یونیورسٹی سے ایم اے اور 2006ء میں پی جی ڈپلوما اِن ماس میڈیا کی ڈگری حاصل کی۔ جامعہ ملیہ اسلامیہ سے 2009ء میں ایم افل اور 2016ء میں ڈاکٹریٹ کی سند سے سرفراز کیے گئے۔ اِس درمیان کچھ مدت (2009-2010ء) کے لیے عارضی طور پر پٹنہ مسلم ہائی اسکول، پٹنہ میں بحیثیت اُردو اُستاذ تدریسی خدمات پر مامور رَہے۔ نیز 2008-2009ء کے مابین ماہنامہ ’’ماہِ نور‘‘ دہلی میں اسسٹنٹ مدیر کے طور پر فریضہ انجام دیا ہے۔ 

 ڈاکٹر موصوف عہد طالب علمی سے ہی تحریر و قلم کا ذوق رکھتے ہیں۔ اُس وقت سے اب تک دینی وعلمی اور سیاسی وسماجی موضوعات پر مسلسل لکھ رہے ہیں۔ زودنویس بھی ہیں اور خوب نویس بھی۔ سیکڑوں مضامین و مقالات متعدد اخبارات و رسائل میں شائع ہوچکے ہیں اور یہ سلسلہ ہنوز جاری وساری ہے۔ 2012ء میں خانقاہ عارفیہ، سیدسراواں، الہ آباد سے منسلک ہوئے اور ماہنامہ ’’خضر راہ‘‘ سیدسراواں کے مدیر مسئول ہوئے اور تاحال اِدارتی ذمہ داریوں کے ساتھ ساتھ جامعہ عارفیہ میں درس و تدریس کے فرائض پر مامور ہیں۔ علاوہ ازیں نومبر 2024ء سے ’’رونامہ انقلاب‘‘ سے بحیثیت کالم نگار منسلک ہیں۔