Monday, January 30, 2023

علما مثل آب ہیں

امسال (۲۰۱۲)عید کے بعدچندلوگوں کے ساتھ جن میں ایک عالم دین بھی تھے،دھاراوی ممبئی میں حضور داعی اسلام کی ایک مجلس میں حاضری کی سعادت حاصل ہوئی ۔تعارف کے بعد گفتگو شروع ہوئی اور آپ نے فرمایا:
علما پانی کی طرح ہیں،پانی کبھی اپنے طبعی رنگ ،بواورمزہ پر باقی ہوتاہے جب کہ کبھی ان اوصاف میں سے کوئی ایک وصف بدلا ہوا ہوتاہے۔یوں ہی کچھ علماایسے ہوتے ہیں جو اعمال صالحہ کے رنگ میں رنگے، اخلاق حسنہ کی خوشبوسے مہکتے ہوتے ہیں اور ان کے اندر عقائد صحیحہ کا ذوق ومزہ رچا بسا ہوتاہے جب کہ بعض علما ایسے ہوتے ہیں جن پر اعمال صالحہ کے بجائےمعصیت کا رنگ چڑھاہوتاہے،ان کے اندرسے بداخلاقی کی بدبو پھوٹتی ہے اور ان کی طبیعت میں بدعقیدگی کی بدمزگی پائی جاتی ہے ۔
فقہائے اسلام نے فرمایا ہے کہ:اسی پانی سے طہارت حاصل کرنا جائزہے جو اپنے مذکورہ بالا تینوںاوصاف پر باقی ہواوراگر ان تینوں اوصاف میں سے کوئی ایک وصف بھی بدل جائے تو ایسی صورت میں اس پانی سے طہارت حاصل نہیں کی جاسکتی۔چنانچہ جو علمااعمال صالحہ ،خوش اخلاقی اور خوش عقیدگی تینوں کے جامع ہوںان سے ہی دین کو حاصل کرناچاہیے اور انھیں کی صحبت میں بیٹھنا چاہیےاور جن علما پر بداعمالی کا رنگ چڑھا ہو ،جن سے بد اخلاقی کا تعفن پھوٹتاہو اور جن کی طبیعت میں بدعقیدگی ہووہ فاسق مردودالشہادہ ہیں ان سےنہ دین لیناچاہیے اور نہ ان کی صحبت میں بیٹھنا چاہیے اور اگر لوگوں کی طبیعتیں ایسی ہوگئی ہوں کہ ان کو صاف وشفاف پانی اچھا نہ لگے بلکہ گندہ اور گدلا پانی میٹھا معلوم ہوتو یہ ایک بیماری ہے اور اس کے علاج کے لیے مشائخ کی صحبت اختیار کرنی چاہیے۔
اللہ تعالیٰ کا ارشادہے: وَ اصْبِرْ نَفْسَكَ مَعَ الَّذِیْنَ یَدْعُوْنَ رَبَّهُمْ بِالْغَدٰوةِ وَ الْعَشِیِّ یُرِیْدُوْنَ وَجْهَهٗ وَ لَا تَعْدُ عَیْنٰكَ عَنْهُمْ تُرِیْدُ زِیْنَةَ الْحَیٰوةِ الدُّنْیَاوَ لَا تُطِعْ مَنْ اَغْفَلْنَا قَلْبَهٗ عَنْ ذِكْرِنَا وَ اتَّبَعَ هَوٰىهُ وَ كَانَ اَمْرُهٗ فُرُطًا۝۲۸ (کہف)
ترجمہ:اپنے آپ کو ان لوگوںکی صحبت میں جمائے رکھوجو صبح وشام اس کی رضا کے لیے اپنے رب کو پکارتے ہیںاور دنیاوی زیب وزینت کے لیےان سے اپنی نگاہیں نہ پھیرواور ان کی پیروی نہ کرو جن کے دل کو ہم نےاپنی یادسے غافل کردیاہے، جو اپنی خواہش کا غلام ہے اور جس کا معاملہ حدسے آگے بڑھا ہوا ہے۔

(خضرِراہ ، مئی ۲۰۱۳ء)

Share

Latest Updates

Frequently Asked Questions

Related Articles

اہل عقیدہ کے پانچ طبقات

حضور داعی اسلام دام ظلہ العالی کی خدمت میں علما کی ایک جماعت کے...

نبی کریم صلی اللہ علیہ وسلم کی بعثت کا مقصد

عارف باللہ مرشدی حضور داعی اسلام ادام اللہ ظلہ علینا نے ایک مجلس میں...

اللہ جیسے چاہے اپنا دیدار کرائے

۲۷؍اگست ۲۰۱۶ء بعد نمازِ مغرب حضرت داعی اسلام دام ظلہ کی ہفتہ واری عرفانی...

عوام اور خواص کے عمل میں فرق

سلطان العارفین حضرت مخدوم شاہ عارف صفی قدس سرہٗ کے۱۱۷؍ویں عرس کے موقع پر...