Monday, January 30, 2023

ایمان و عمل پر خود بھی قائم رہیں اور دوسروں کو بھی ان کی دعوت دیں

خانقاہ عارفیہ میں محفل مولائے کائنات کا انعقاد
کائنات ارضی میں انسان کے پاس اگر کوئی قیمتی شئی ہے تو وہ وقت ہے۔ اگر انسان اس قیمتی اور انمول نعمت کی   قدر کرے اور اپنے وقت کا صحیح استعمال کرے تو اس کا وجود تو ختم ہو جائے گا لیکن رہتی دنیا تک اس وجود کے ثمرات باقی رہیں گے ۔خاص طور سے طالبان علوم نبویہ کو اپنے قیمتی وقت کی حفاظت کرنی چاہیے اور اس کا صحیح استعمال کرنا چاہیے تاکہ وہ ایک جید اور باعمل عالم بن کر دین اسلام اور قوم کی خدمت کر سکیں ۔ مذکورہ خیالات کا  اظہار جامعہ عارفیہ، سید سراواں، الہ آباد میں مولائے کائنات سے منسوب محفل میں حضرت مولانا محمد ذکی ازہری استاد جامعہ ہذا نے کیا۔ واضح ہو کہ یہ محفل دو حصوں میں منقسم رہی ،پہلا حصہ بعد نماز مغرب تا عشا رہا۔ محفل کی ابتدا قاری ابو عبیدہ صاحب کی تلاوت سے ہوئی ۔ اس کے بعد مولانا اختر تابش سعیدی اور حافط شکیل صاحبان نے حمد ونعت کے اشعار پیش کیے۔مولانا ازہری نے قرآن وسنت اور اعمال سلف کی روشنی میں وقت کی اہمیت اور اس کے صحیح استعمال پر جامع گفتگو فرمائی۔
 بعد نماز عشا نقیب الصوفیہ مفتی محمد کتاب الدین رضوی صاحب کا پر مغز خطاب ہوا۔ آپ نےسورہ عصر پر روشنی ڈالتے ہوئے فرمایا کہ ہمیں قرآن وسنت کی تمام باتوں پرمکمل یقین ہونا چاہیے۔ ہم ان لوگوں کی طرح نہ بنیں جنہوں نے قران کی بعض آیتوںپر ایمان لایا اور بعض کا انکار کیا ؛بلکہ عملی طور سے اس فعل سے بچنے کی کوشش کریں ، وگرنہ ہمارا یہی حال رہا اور ہم قرآنی آیتوں کا مخاطب خود بننے کی بجائے دوسروں کو سمجھتے رہیں تو ہم ایک بار کیاسو بار بخاری کا درس دے دیں ہماری زندگی خائب وخاسر ہی رہے گی، ہم نامراد وناکام ہی رہیں گے ۔نیز آپ نےسورہ عصر پر مفسرین کے حوالے سے گفتگو فرماتے ہوئے کہا کہ ایمان اور عمل صالح کے ساتھ ساتھ ہم حق یعنی ایمان کی تلقین کریں لوگوں کو ایمان کی طرف بلائیں اور صبر یعنی اعمال کی طرف لوگوں کو مائل کرنے کی کوشش کریں ۔اگر ہم ایسا کرتے ہیں تو کل بروز قیامت ہمیں نجات ملنے کے ساتھ ساتھ درجات بھی ملیں گے ۔علم و عرفان کی یہ محفل صلاۃ و سلام اورسرپرست اجلاس حضور داعی اسلام شیخ ابو سعید شاہ احسان اللہ محمدی صفوی کی دعا پر اختتام پذیر ہوئی ۔ بعدہ محفل سماع کا انعقاد ہوا، جس کے بعد لنگر عام کادور چلا ۔

Share

Latest Updates

Frequently Asked Questions

Related Articles

انصاف قائم کیے بغیرسماج میں امن وشانتی نہیں ہو سکتی۔ عبید اللہ خان اعظمی

خانقاہ عارفیہ ، سید سراواں میں امن وشانتی کا پیغام انسانیت کے نام کے...

اہل حق حیلہ سازی نہیں، جاں نثاری کرتے ہیں

خانقاہ عارفیہ ، سیدسراواں میں ذکر شہادتین کی محفل کا انعقاد سید سراواں ، الٰہ...

خطبہ داعی اسلام بموقع امن وایکتا سمیلن

تالکٹورہ اسٹیڈیم، نئی دہلی، بتاریخ ۵؍ اگست ۲۰۱۹ء اس وقت ملک کے جو حالات ہیں...

اسلام تمام نسل انسانی کی حفاظت کا ضامن ہے : مولانا عارف اقبال

خانقاہ عارفیہ میں ۳ ؍روزہ سلطان العارفین مخدوم شاہ عارف صفی محمدی کا ۱۲۰...